老鍋台式火鍋 (京都廣場) (已結業)

環境非常闊落，多卡位私隱度高，最緊要係地方清潔乾淨，唔會覺得油煙好勁，食得好舒服。除左打邊爐外，亦有台灣小食可以選擇，今次叫左份台灣香腸試下，份量多，味道好有台灣風味，勁正。講返食物，湯底揀左酸菜白肉鍋，酸菜份量好多但唔會過酸，加上蕃茄粟米同好多腩肉，淨食湯底都抵返哂。涮鍋小羊肉片羊味好夠濃，切得薄好快食得，唔駛點任何醬汁都好好味。老鍋丸餃井字盤 (魚皮餃，梅菜丸）魚皮餃新鮮，另外梅菜丸好特別，梅菜既咸香味令豬肉丸味道更加特出。冷泡白桃烏龍茶 冬瓜茶台式飲品選擇好多，烏龍茶消滯，冬瓜茶鮮甜，雖然去唔到台灣，能夠食到飲到台灣正宗味道，真係非常滿足。