菜單多元化都有好多選擇，因為想試齊唔同野食，所以叫咗小食拼盤、炸蝦餅撈檬同青木瓜豬頸肉沙律食😋口喝叫埋蜂蜜柚子茶同咸檸七，標準做法。
第一份上菜係撈檬，好好食差d唔記得影相🙈蝦餅新鮮炸起，外層香脆內層爽口彈牙！檬粉粉質較幼身，食落好香米味，調味汁都掩蓋唔到佢陣米味！
慣性自助落撈檬汁，幾鍾意佢個玻璃樽口，容易控制落汁嘅份量，出面嘅瓶口太闊，我次次唔小心就落得太多好似浸湯咁lol
青木瓜多到唔駛錢咁，配洋蔥同花生碎，可以用撈檬汁拌住一齊食，清新開胃。豬頸肉比較厚身大大塊，邊位燒得甘香，口感略嫌韌左少少。
原來小食幾大份唔客氣，2個人食每人都有兩件扎肉、雞翼、春卷食，豬頸肉就多到食唔晒🙈扎肉有兩隻味，原味同有餡，餡料係豬耳仔，食落爽脆為扎肉平添豐富口感。香茅雞翼同春卷炸得乾爽冇油，米紙卷住素菜香口得來清爽唔肥膩，雞翼就食得出係有香茅，而且肉質嫩滑😳一啖你就食得出全部都係自家製作！
因為食得出菜式既味道同口感同出面既食肆真係有差別，忍唔住向伙計探料，原來老闆專程係越南學廚，材料都係越南入口，務求將當地口味完美呈現。好高性價比！野食份量太大，2個人食唔哂先係百零蚊埋單。不過可能天氣熱，冷氣有d大，啲菜嚟到好快變凍，得快d趁熱食！
