銘興山西刀削麵 (厚福街)

尖沙咀終於有刀削麵食啦！行過厚福街，見到有一間新餐廳，專門買刀削麵，即刻好興奮。
雖然係新餐廳，估唔到都幾多人，裝修企理，好光猛，望一望個餐牌，都幾多嘢食，選擇困難症即刻發作。

由於今日好肚餓，於是點咗麻辣牛筋腩刀削麵
同涼拌肥牛。呢度啲嘢食好大份，涼拌肥牛，入面有好多青瓜絲同埋花生，唔會好辣，好惹味，食得出係高質肥牛！

麻辣牛筋腩刀削麵，麵同埋餸係分開的，牛筋炆得好淋好入味，入口即溶，腩肉質鬆化，刀削麵亦都好彈牙，湯底香濃。

最後跟餐加$6可以加凍飲，以後可以成日過嚟幫襯。