黑門水產すいさん (棉登徑)

K11外面有條棉登徑，呢度開咗好多日本餐廳，今次我哋就試呢間黑門水產。作為日本菜，食材嘅質素好決定道菜好唔好食，一來到我哋叫咗三文魚加州反卷。三文魚加上蟹籽同蛋黃醬。呢個配搭永遠唔會令人失望。刺身方面，叫咗刺身6盛。當中包括三文魚、赤身、油甘魚、海膽、帆立貝同真鯛。每一塊都係厚切，一啖放入口好滿足。特別想講吓海膽，自己好怕唔新鮮嗰種腥味，呢度海膽除咗新鮮，仲會有紫菜俾你一齊夾。紫菜冇鹽粒係上面，唔會俾鹽味蓋過海膽嘅鮮味。之後我哋叫咗個甲羅燒，仲要即場燒俾我哋，未燒之前已經擺得好靚。燒完可以配梳打餅一齊食，如果梳打餅唔夠仲可以refill。除咗甲羅燒，極上大漁貝燒都係即場燒。即場將牛油燒溶，再滲入去蝦肉同蠔。燒嘅同時會加酒，香氣四溢，食落去好正。唯一唔慣係之前未食過熟嘅三文魚籽。原來熟咗會變白色。口感有少少膏狀。同平時刺身咬落去會爆開好唔同。成晚最特別係呢個魚子醬脆脆包，細細個包上面居然放咗咁多樣食材。吞拿魚、魚子細、海膽、蟹籽、三文魚籽但每種食材又唔會特別有一種會搶味。今次食得好滿足，因為好耐都冇食日本嘢。去唔到日本暫時止下口癮先。