服務態度好差，唔會再去或recommend 其他人去。我本身有book 位，坐低之後先知要由二人改成三人，就通知店員，其中一個staff 個樣勁大怨氣，當住我面前話比另外一個staff 聽「落booking 時冇講lor」，嗰時其實唔full，已經係lunch hour 尾聲, 仲要我隔離係一張空枱，只要清左張枱再拍埋就可以輕易變成四人枱，唔知點解要表達到間野好忙冇落booking 就改唔到人數咁。我叫左個all day breakfast, 揀左玫瑰蘋果jam, 個jam 同個toast 係好食嘅；個蛋都ok，只不過唔覺有芝士；茄汁豆、腸仔同煙肉就普通，d 菇我覺得唔夠juicy。另外我同朋友share 左個果醬紅茶, 揀左桂花雪梨jam, 個紅茶好香，d jam 份量都generous, 成個組合都好好飲，美中不足係原來唔係隻隻jam 有得配嗰d 果醬飲品，而menu 又冇寫清楚。
其實喺咁嘅環境食all-day breakfast 應該好relaxing, 但係d 服務態度令到成件事好唔relaxing，每個員工都全程黑面，問你揀咩jam 真係monotone 用三隻字問「咩果醬」，真係衰過茶餐廳。我唔知d 員工係咪老闆d friend 所以個個都好似搏炒咁，而長期有咁多關於服務態度嘅負評都冇回應或改善過。如果想食佢d 果醬我建議自己買一樽返屋企食好過，all-day breakfast 可以去其他地方食。
