靠得住粥麵小館 (奧海城二期)

营业中

休息中

奧海城嘅餐廳依排大洗牌，好多食肆抵唔住貴租被迫搬走，然後，又有新店試水。「靠得住」有啲名氣，而且奧運站頭茶餐廳相對少，自然一開張就大排長龍。適逢週六下午茶時間經過，見唔駛排隊，決定試吓。但企咗喺門口兩分鐘，都冇人帶位，叫個侍應仲越叫越走，第一吓印象分即刻大打節扣。之後，因為我哋面前就係一張吉檯，所以決定自己埋位坐，再叫人開茶，今次有人理啦……茶包香香哋，係花茶嚟嘅，都幾特別。我、老公同囝囝三人，點咗以下食物:白灼生腸: 同我童年回憶有啲距離。記憶中生腸應該係白色半透明嘅，唔通以前嘅係漂白？食落有好輕微羶味，但薑葱同辣豉油搭夠，都算幾好食。我下次應該唔會再叫生腸，但可以試其他白灼品種。炸醬麵: 醬汁味道唔錯，麵有勁但唔會過份彈，整體ok。星州炒米: 炒得香口，有辣味但唔過份，乾身唔會太油，我鍾意。椒鹽豆腐: 都幾大碟，塊皮脆得嚟有啲硬，但豆腐好嫩滑。冇附醬汁，要問先比喼汁，不過不失。整體都算滿意，我覺得應該係介乎「笑笑」同「ok」之間，老公話可以用下次會唔會再嚟而衡量，因為都會再嚟，所以比咗「笑笑」，但若排長龍就唔好啦。