▫️麻吉臭臭鍋 - 小辣 ($188) 4/5
見到門口有牌介紹麻吉鍋，應該係呢到嘅招牌菜，我地簡咗最特別嘅麻吉臭臭鍋。餐牌有介紹臭臭鍋會加入臭豆腐同豬大腸，再配上用沙茶醬及豆瓣醬調製嘅高湯整成。所有食材都充滿住湯底嘅酸臭味，特別係蔬菜類同臭豆腐，索曬湯汁之後夠曬重口味，別有一番風味。可惜鍋入面見唔到有豬大腸，身為內臟愛好者有啲失望，以呢個size嚟講呢個價錢亦有啲進取。
▫️蚵仔煎配海山醬 ($78) 3.5/5
蚵仔幾大隻同埋有鮮味，不過略嫌粉漿太多，唔太值呢個價錢。
▫️麻婆豆腐軟殼蟹拌麵 ($108) 4/5
麵條煙韌有咬口，配埋辣辣地嘅麻婆豆腐幾惹味。軟殼蟹大大隻，炸到脆卜卜之餘炸粉又唔會太厚。
▫️檸檬愛玉冬瓜茶 ($38) 3.5/5
飲第一啖覺得有啲甜，篤多啲塊檸檬之後酸味中和咗冬瓜茶嘅甜味，配埋愛玉幾fresh。
店員服務態度好好又親切，雖然價錢唔算平，但係喺尖沙咀商場入面都預咗有一半價錢係比租，綜合食物質素，位置同服務嚟講個人覺得可以一戰。
Overall rating (5粒⭐️為滿分)
味道：⭐️⭐️⭐️
服務：⭐️⭐️⭐️⭐️
環境：⭐️⭐️⭐️⭐️
性價比：⭐️⭐️⭐️
