素來素往 (已結業)

阿姨剛去完素來素往，大讚那裡的素菜好食，於是我便同媽媽和妹妹一齊試下。其實我地都好少食素，所以今次都算係一個新嘗試。餐廳唔係好大間，但落地玻璃令整體感覺開揚，唔會有局促感。食物主要放在中間兩邊。我地幫襯下午茶時段，每位$68任食無時限，真係好抵。食物種類豐富，除左沙律，清菜外，亦有似模似樣的口水雞和辣鳳爪。 我最愛蒸水蛋，真係超滑，食完一round 又一round,另外欖菜四季豆亦煮得好入味。媽媽鐘意食皮蛋粥，佢話食左好舒服，同埋咕嚕齋，味道適中，唔會重口味。而妹妹就鐘意蕃薯糖水，佢話夠薑又唔會太甜，同埋芋頭魚都好正，外皮好鬆脆，外脆內軟，可以加埋甜酸汁，但其實原味已經好好食。另外甜品有豆腐花，班蘭千層糕同埋南瓜千層糕等，都值得一試。整體感覺係一間有誠意的餐廳，不單價錢超值，食物質量唔錯，難得素菜不斷補充，唔會因為手腳慢左就食唔到好野。隔鄰枱的嬸嬸話佢每個星期都會來，佢雖然住新界都專誠來食，真係好捧場。