榕記車仔麵 (已結業)

是日同老豆一行二人去食車仔麵，去到都幾乎坐滿人，不過好好彩岩岩好有位唔洗等。去到見到啲餐單，啲湯底幾特別。睇完餐單，叫左麻辣湯三餸麵 (小辣)同海南胡椒豬肚湯三餸麵，仲叫左雞絲粉皮 (麻辣醬)share。先講雞絲粉皮 (麻辣醬)，麻辣醬好惹味，夠哂麻，粉皮都夠滑夠爽，唯獨雞絲有啲扣左分，因為太乾太鞋口啦！然後到果海南胡椒豬肚湯三餸麵，雖然唔係我點，但當然要試下果湯啦，真係好足料，飲落係豬肚湯既味，唔似坊間啲車仔麵甘得果普通味精湯，呢個湯底真係飲得出誠意。老豆都話啲豬手豬腸炆得好淋好入味，大讚好食。我自己就叫左麻辣湯三餸麵 (小辣)，三個餸分別係柱候牛腩，手打牛丸同魚肉春卷。先講果湯先，我本身食得辣既，但都覺得呢個小麻辣好夠麻，因為出面食親都只辣不麻，但呢個夠哂麻辣，岩哂我。牛腩好入味，唔錯，至於牛丸同魚肉春卷就有啲普通啦。整體黎講，野食質素高，湯底真係好有誠意，服務都唔錯，店員反應快，下次都一定會去幫襯。