常麵館 (已結業)

下午成三點鐘，仲未食晏好肚餓啊，到左附近的常麵館食野，店舖細細但入面好多公仔呀，店主係動漫粉絲咁樣喎。天氣咁熱就梗係轉凍飲啦，要左凍奶茶同凍檸茶，奶茶有茶味又夠滑，好飲，檸茶走左甜都無苦澀，仲有四片檸檬添，正呀。自己叫左個三餸麵餐，呵呵，係芫荽呀！餸方面要左芫荽+芫荽豬肉餃+豬大腸，配米粉豬骨清湯+成仔辣汁嘅小辣，芫荽仲可以加錢叫多荽，哈哈。湯底幾清甜，小辣都好有辣勁，正。大腸滷得軟腍入味，仲幾有咬口。芫荽餃大大隻，豬肉同芫荽比例唔錯。河粉夠晒滑，份量仲好多添。加左個小食麻辣藕片，好爽口，麻辣汁開頭食甜甜地，後來係越來越辣，正喎。仲有炸燒賣，炸到卜卜脆，外脆又軟綿綿。朋友叫左常餐，炸魚柳大大件，都幾滑㗎。黑松露炒蛋勁香，仲有件厚多士添。另外個餐仲配一碗粉麵，叫左公仔麵，正正常常囉。小店都幾好坐立，不過可能門口位，唔多夠冷氣有啲焗呢。