龍門冰室 (已結業)

突然之間好想食個港式鐵板，經過呢間餐廳，見到 佢個星級雜扒有西冷，雞扒，英式腸，炸帶子，仲有比較少喺港式扒餐裏面見到嘅煙三文魚添，我就知道係佢喇…餐湯係蕃茄羅宋湯，上枱嘅時候熱辣辣，有香濃既茄膏味，對於鍾意食湯渣嘅我，會覺得如果湯渣再多一啲相信會更加好。星級雜扒，一上枱已經被嗰朵由煙三文魚 整成嘅玫瑰花所吸引，估唔到茶餐廳都有咁嘅賣相，實在令人驚喜；雞扒經過兩面煎香，雞皮脆卜卜，英式腸腸衣堅韌，比起平時嗰啲雜扒嘅廚師腸味道更加豐富，西冷扒係大大嘅一塊，配合住我哋經典嘅港式黑椒汁，非常滿足。另外仲叫咗個黑松露薯條，薯條炸得脆身，上枱嘅時候仲係辣口㗎，個黑松露醬好 creamy，再唧啲茄汁間住嚟食就啱啱好喇。臨走見到隔離枱嗰個流心奄列亦都相當之吸引，下次要嚟試埋佢先得。