紅米 (六合街)

本身對茶記要求都唔高，短短得唔夠一個鐘食飯時間，見紅米唔使排隊就入去。利申以前喺呢頭返過工，差唔多個個星期食。點解我覺得佢係轉咗手，以前真係覺得佢好食，但係依家覺得好難食，唔係一般嘅難食，而且擺盤同之前都唔同。
咖哩牛筋腩飯，嚿牛腩好奇怪，完全唔似平時食開嘅牛腩，又難食。最嬲嘅係，薯仔竟然係俾薯角？？？會唔會太冇誠意(咁啱我前一日去咗荔枝角紅米分店，食佢哋嘅下午茶—雞髀配薯角，完全係同一款薯角，仲要係攤到凍咗都唔翻熱就攞出嚟……)
另外，和牛漢堡扒蛋包飯，呢嚿咁嘅肉真係和牛？煎到冇煎過，懷疑係微波爐叮出嚟，咬落係完全冇肉汁同埋油脂，我真係唔會相信佢係和牛。唯一冇咁嬲嘅係佢嘅蛋包飯係炒飯底，同埋凍檸茶都係正正常常~~

1