Fifty Fifty (已結業)

之前妈咪推介呢一间，话系长沙湾好受欢迎，所以趁放假前嚟试一试。佢都几近地铁站，唔难揾。我地好早六点去到，有几枱食紧，座位主要系木櫈木枱，正正常常阔度，无话特别舒唔舒服。餐厅系扫qr code睇餐牌，再叫人落单，所以都几环保，又唔使掂啲长期唔知几多人摸过嘅纸。每个set包汤、是日甜品同$20嘢饮，即系最普通个啲柠茶奶茶，超过就补差额。甘荀汤我觉得就麻麻地，好淡口，闻唔到咩甘荀味，同埋食得出加咗粉嚟煮，无跟餐包怪怪的。大啡菇意大利饭就几好食，个汁好浓，啲饭煮到一粒粒被酱汁包围好弹牙有口感，系有水准之作。意大利云吞亦出奇地好味，每一只嘅size都差不多，咬下去闻到好香嘅黑松露味，伴上调味得刚刚好嘅白汁，连埋侧边啲小菇一齐食，令人好满足。甜品系芝士蛋糕，就正正常常无乜特别。总括而言，百几蚊一个set，好经济实惠，主食质量有水准，可以返食。