紅心麵包西餅

路經佐敦，見到有間麵包舖出面有陣陣剛出爐的麵包香味，不禁吸引左我入去逛下。麵包西餅舖基本上成行成市，要突圍出奇制勝除左麵包新鮮出爐外，仲要有特別款式先可以Stand out，今次都試左幾樣平時比較少見的款式。

[紫芋魔糍蛋糕] - $48
一望到個款式就諗起而家人氣的JellyCat，除左招牌笑容外，仲用朱古力整埋「雙腳」都幾有心思。味道方面，好處係唔會太多Cream同太甜，而內裏除左蛋糕同紫芋味的忌廉外，仲要芋頭粒同埋正方形的Mochi，增加蛋糕口感的層次。而餅皮係軟檽的雪米糍皮，睇得又食得，成個蛋糕唔洗五十蚊都算抵食。

[板芝雞腿包] - $25
呢款就應該係某連鎖店出名的款式變奏版，外皮都加上芝士，所以食落去有脆口的感覺。而內裏亦有芝士醬。另外雞腿夠大塊，同埋都幾嫩滑，食完都幾飽。

[麵包蛋糕] - $12
呢款真係未見過，同「瀨尿牛丸」有異曲同工之妙，完全無諗過麵包同蛋糕可以擺埋一齊。不過食落去味道同口感都唔錯，首先包的表面係加左菠蘿包皮，麵包整得硬少少，好似餅皮一樣，之後包住柔軟的海錦蛋糕，食落去個感覺好特別，有內脆內軟的感覺，而味道又出奇地夾。

黑糖咖啡包 - $13
由於岩岩出爐，所以聞到陣陣咖啡香，加上咁平就咁大舊，所以都忍唔住手買埋佢。雖然番到黎都凍左，但鬆軟的質感仲維持到，食落去淡淡優雅的黑糖咖啡的味道，如果早餐時段配埋咖啡真係幾夾。