煮打菜打冷小菜館 (已結業)

午餐時間經常嚟「煮打菜」用膳，因為碟頭飯勁大碟，自己KO一碟勁滿足，又或者一班同事叫幾個小菜食，是另外一種大滿足，每次必叫肉餅，因為肉質彈牙又爽口，令人回味無窮。碰巧今晚無飯食，拉埋同事陪我食埋個晚飯先走，準時六點放工去食，保証唔洗等位，仲可以坐到卡位。兩個人叫咗三個小菜，分別是「蜜椒吊燒骨」、 「糯米釀雞翼」及「蟹肉扒西蘭花」。「蜜椒吊燒骨」勁惹味，排骨的肉肥瘦相間，有少少黑椒味，面層炸到有少少脆，再淋上蜜糖汁，做到有少少焦化的口感，很有驚喜。而「糯米釀雞翼」的糯米飯有少少辣，似係泰式的風味。因為本身已經好夠味，完全唔洗「點」 附送嘅泰式辣醬。食完兩個相對濃味嘅小菜，最後食埋個清清地嘅「蟹肉扒西蘭花」，蟹肉份量十分多，生粉芡唔會太重口，如果可以加番少少顏色配搭，視覺上會更好看。