生記鮮魚湯米線 (已結業)

上環的食肆一向轉得好快，尤其係蘇杭街，幾乎每個月都會有新店開張。隔離嘅禧利街反而有好幾間屹立不倒嘅老字號，例如孖沙茶餐廳同生記生滾粥。根據我已退休嘅老細講，佢細細個時生記已經喺上環打響名堂，當年嘅粥品屬於貴價貨，一般打工仔唔可以日日食。時移世易，香港地食粥已經係最平民嘅選擇，生記啲粥亦都唔可以話貴。而家佢仲喺禧利街開咗三間舖，一間做粥，一間做牛腩麵，另外一間做魚湯米線。到咗食晏時間，三間都會排滿晒人。今日叫咗豬頸肉魚腐米線。呢度嘅湯底係順滑但魚味唔重，適合我呢的唔鍾意腥味，但又想有非化學湯底嘅人。魚腐吸收咗湯汁，無咁熱氣；豬頸肉就有小小甜味。整體不過不失。