Glasshouse (形點 I)

营业中

休息中

每次嚟yoho睇戲都會留意到戲院對面角落呢片小綠洲，一直以為屬於輕食西餐cafe。翻閱餐牌先知原來係fusion菜每道菜式都融合不同國家風格，韓式醬料加圍邊蛋炒意粉、蝦米雞蛋仔、龍蝦湯河⋯⋯配搭新奇又意想不到。餐廳空間比想像中大得多，深入餐廳裡頭更闊絡，水吧廚房為開放式設計，可以清晰睇到食物製作過程。生菜包通常都配以絞肉碎，包炸餃子真係第一次。餃子炸得金黃香脆，以新鮮濕潤嘅生菜包覆，再蘸上酸酸甜甜嘅燒肉汁，呈現出外爽中脆內嫩嘅三重口感，呢個配搭令人驚喜燒春雞份量十足，大大隻，皮薄肉嫩，不帶多餘脂肪，精簡地灑上薑黃燒熟，更能展現新鮮食材嘅原汁原味。燒熱嘅鐵板遇上充滿雞味嘅濃郁雞湯，奏出美妙嘅滋滋聲，墊底嘅薯仔、洋蔥、薑汁遇熱生香，視聽嗅三種感官同時刺激令人食指大動。正宗雞有雞味，咬落啖啖肉，滿足感十足。Pizza比想像中更大個，直徑12吋size，幸好係脆邊薄底，兩人share都唔會過於飽滯。未食已聞到陣陣松露香，反而鹹蛋味不算突出。因選用薄底，入口無粉感較輕盈，又能食到椰菜花薄片嘅爽脆同鹹蛋獨特嘅沙沙口感，簡單但又層次分明，難怪店員極力推薦pizza類。