一起‧金饍

尋日遲咗去食飯，漫無目的咁去搵野食，落到去廣場地庫睇下，被一間充滿k-pop音樂的餐廳吸引咗入去。坐低後，四圍望間餐廳，再望下其他人食咩。呢間餐廳既裝修同平時去食既韓國餐廳唔同，無咗啲傳統佈置，換來係較時代感既裝潢，應該係走型格路線。又有幾部電視播放梗韓國既音樂節目，啲歌都好係快歌，應該啱晒而家去追韓風既年青人。
食物方面，我見周圍既人食梗泡菜飯，飯卷，湯麵等...但反正走入咗呢間非傳統韓國餐廳，我諗都應該試啲新穎啲既野配合下，所以最後叫咗一個'冰湯涼麵'嚟試下。侍應將麵攞到嚟我面前，個樣同餐牌既相一樣，都有支唧筒插住係麵入面。我問侍應，呢支唧筒入面係咩嚟，原來係泡菜既湯汁，俾客人唧落啲麵到食，好搞笑。仲有啲麵有啲冰墊底，原來啲冰係用泡菜湯汁雪製而成，保持到冰涼之餘，又唔怕味道變淡，呢道菜好有心思，而且充滿泡菜味道，哈哈!
下次可以再嚟試下其他野食，不過原來聽得多強勁音樂，會令人有啲煩...可以較細聲少少就好

冰湯涼麵