小神燈新派飯館 (已結業)

今日去朋友屋企，佢話可以試下呢間新潮中式菜，幾個人就入去食個晚餐。我哋叫咗個豉椒炒鵝腸，糯米炒膏蟹，超爆多蒜水晶雞，薑蔥魚頭煲，同醬香骨。總體嚟講佢啲小菜都好有鑊氣，豉椒炒鵝腸啲鵝腸好新鮮， 唔會用雞腸，而且個味道調得啱啱好，亦都好有鑊氣份量，亦都好足，起其他舖頭真係好少食到咁有質素嘅鵝腸。水晶雞好有雞味，而且啲雞好滑，但係又唔會好淋，好有咬口，上面仲加咗超爆大量多嘅蒜蓉，勁香勁好味。今日嘅主角係糯米炒蟹，隻蟹勁大隻，好新鮮肉質好實，而且好入味，幾個人食每人食一兩嚿。糯米唔會太乾身 ，淋淋地，有少少蟹味，如果加返幾粒蔥花就一流啦。薑蔥魚頭煲個魚頭size都幾大，有少少肉身，炒乾曬個魚頭，好香口，送飯一流。醬香骨又係另一道送飯必點小菜， 味道濃郁， 炸得香口。半肥瘦豬肉中，食上嚟唔會太乾身又唔會覺得太肥膩，一嚿其實已經可以食到一碗飯咁濟。臨走前仲見到佢有平價午餐六七十蚊包個飯前菜同點心，朋友話下次同屋企人嚟再試下。