而家去食飯，都多左餐廳轉左用手機掃QR CODE落單，可以感受到餐廳都跟上科技，咁就唔怕繁忙時間搵唔到職員落單同埋會漏落單
同朋友分別叫左 D餐($108)：女神麵 + 蠔油菜心，加配蘿蔔(+$9)，轉抹茶紅豆冰(+$9)、男神麵($88)加配豬手(+$18)、流心蛋(+$9)、豬腸(+$9) 轉抹茶紅豆冰(+$9)、香脆南乳雞翼($28)、懷舊蝦多士($28)、永年辣汁牛腩($38)、樽仔奶茶($28)、土炮大茶飯($48)
抹茶紅豆冰：抹茶味道濃厚，唔會過甜，透過食紅豆黎提高甜度同口感，幾好飲
樽仔奶茶：飲落去幾香濃又夠滑，港式茶餐廳奶茶水準之上
女神麵：D配料夠晒養顏，補充膠原蛋白，有鮑汁燜花膠、豬手、枝竹球、冬菇、紫菜、蘿蔔、時菜，配料夠多，花膠亦都好大塊！至於永年D辣汁絕對唔會失望，今次揀左中辣，食落辣辣地夠晒惹味，同埋辣得黎有層次感
男神麵：D配料已經夠多，有牛柏葉、牛肚、牛筋、牛丸、牛腩、蘿蔔、時菜，但因為朋友踢完波關係，所以極之肚餓先再追加幾樣配料，上菜見到咁多料，真係淨係睇都已經夠晒飽
夠多餸嘅車仔麵咁樣食先係最爽
香脆南乳雞翼：外脆內嫩，南乳味亦比例適中，唔會重手得濟過鹹
懷舊蝦多士：細細件，容易食，小食之選，唔會太過油膩，再點一點個醬黎食
永年辣汁牛腩：牛腩夠腍，同埋辣汁夠入味，唔係分開煮熟牛腩再淋汁上去咁HEA煮法，夠晒惹味
土炮大茶飯：呢個甜品認真豐富、有原味雞蛋仔、開心果糖、花生糖、龍鬚糖、雞蛋餅、花生酥、蛋卷、花生碎、馬仔、花生醬、煉奶、雲呢嗱軟雪糕，性價比一流！基本上嗌佢黎食就可以一次過享受晒兒時零食嘅滿足感
中意食甜零食嘅朋友一定要嗌
大合照
好多人覺得要喺街邊檔仔食先有車仔麵嘅味道，但永年絕對做到將車仔麵風味帶入去商場裡面而又不失味道，值得推介
補返MENU
