梨滿園韓國料理 (已結業)

熟蟹就是食多啦，第一次食生嘅醬油蟹，我都係帶着戰戰兢兢嘅心情去試吓。呢度兩隻醬油蟹，睇落去都有一隻碗咁大，size 都算係咁，不過都唔敢食太多，始終都係生吖嘛。我對蟹蓋始終都有一種鍾愛，對於呢一種第一次混合嘅方式，感覺甜甜地又鹹鹹地，食落味道真係一流，我都係第一次食，難以比較，但朋友話呢種食法係韓國食都係好正，下次真係要去韓國食番轉。之後當然梗係要食燒肉啦，牛肉真係幾正，自己有獨特嘅醬汁，都算係唔錯。 不過，要講到最正都係呢一個牛肋肉，一食就上晒癮，份量唔多，但係脂肪飽和度非常好。一碟帶子，七大粒。口感都幾爽口，雖然都係雪藏嘅材料，但係呢個價錢食到呢個質素算係性價比幾高。總括來講，我一定會再嚟食多幾次醬油蟹，食完都冇肚痛等等問題出現，下次一次食兩三隻都冇乜問題，至於燒肉，其實選擇都幾多，我食到一半都已經好飽，唔係食得好多。