除咗門口靚，廚房都幾開揚，而且睇到乾淨企理。
始終都係一間Cafe，所以食物款式唔算太多，主要係麵食，亦有漢堡同All Day Breakfast，而款式亦都吸引。
飲品選擇就會比較豐富啲，咖啡類同非咖啡類都有。
首先揀咗個小食，係海鹽焦糖雞翼，原來呢個係單骨雞翼，食起上嚟方便好多，滿滿的一碟，份量都唔少，雞翼炸得脆口又有焦糖嘅甜味，味道不錯。
另外揀咗龍蝦湯配牛油果大蝦稻庭烏冬。
龍蝦湯係分開上碟，可以清楚看到各款食材，我鍾意佢有足足半個牛油果，大蝦都非常爽口，配埋紫菜同木魚絲非常有日式風味。
食客可以隨着自己個人嘅口味倒入龍蝦湯，我自己就會預留少少龍蝦湯留待最後品嚐，試吓佢嘅原汁原味。
另外仲揀咗味噌蟹醬蟹籽蟹肉扁意粉，其實佢主要嘅醬汁都係忌廉汁，混入味噌嘅味道令醬汁帶多點鹹香。蟹膏蟹肉相當豐富，絕對可以食到啖啖蟹肉。
飲品方面我就揀咗簡簡單單嘅凍朱古力，奶味豐富上面又有朱古力粉，係充滿童真嘅味道。
另外我仲介紹老公飲Dirty，不過呢杯Dirty就同我印象之中嘅Dirty有點出入，但飲落口感都還算香滑。
我哋一路食一路都見到好多人嚟幫襯，每位食客都一定會到訪餐廳外嘅打卡位影吓相，果然係文青自選。
