常麵館 (已結業)

好凍既天氣，最岩食個熱辣辣既麵，所以黎左常麵館!簡簡單單但好滿足!兩個3餸麵茶餐($36)，仲有埋野飲，係呢個地段真係好抵，所以好多人黎食!食完仲更加覺得抵，因為份量充足之餘，提供既食材非常優質!!!豬紅大啡菇豬手番茄薯仔湯米線，個湯唔係味精湯，真係食到有番茄洋蔥而且好香濃，個啡菇同米線吸晒D汁好味道，豬紅口感爽滑又夠彈，豬手滿滿骨膠原，3款餸我都覺得好正!食到尾連湯都唔放過飲埋!好飽好豐富!牛肚牛柏葉魷魚蒜香汁撈粗，牛肚乾淨好夠冧，魷魚牛柏葉爽脆，魷魚仲好大條添!下午茶西多士 ($32)，有花生醬加粗花生粒有口感，牛油蜜糖都俾得好大方，好甜好邪惡!瑞士雞中翼 ($28)，有6隻，隻隻都好肥美有肉!再配埋凍檸茶，食完熱野又飲凍野，真係好爽!呢度好多鬼滅figure ，我坐個台有蝴蝶忍~仲要好多NEON 招牌~而且仲有大電視睇~~我影左呢個好出名既我要進來了，岩晒打卡!講真，3點幾入去食，但都真係幾多人被吸引進來了!餐廳都幾易搵，就係歷史博物館對面，而且算係個條街既唯一食店，所以都好當眼!不斷有人出出入入。