地點：尖沙咀棉登徑
菜式：天婦羅居酒屋
6
餐牌：自選天婦羅定食，天婦羅丼，丼飯，小食，飲品，期間限定。晚市有加一。
自選天婦羅定食
呢度有自選天婦羅丼，好flexible。
白飯/冷烏冬/湯烏冬/冷湯蕎麥麵底$30，有加料主食要加錢，然後就加錢加料自選啦。
冷烏冬好大碗，個湯夠清而烏冬有咬口又滑溜，可以揀蔥同日式芥末份量，好體貼。
廣島蠔 加$20
廣島蠔好多汁又大隻。
黑虎蝦 加$13
黑虎蝦都好大隻，蝦肉鮮甜。
鮮帶子 加$20
帶子肉真心鮮美又嫩，好香帶子味。
雞肉 加$13
第一次食天婦羅雞肉，好特別！
成個餐包清淡龍蝦味噌湯一碗，漬青瓜一小件同鮮橙半件。
花尾龍躉 $28
另外點左個花尾龍躉天婦羅，大大件。肉質有咬口，魚味濃，下底墊有好多脆脆。
唐揚魷魚鬚 $38
唐揚魷魚鬚一客有十幾件，Size易入口。整得皮脆肉有咬口，唔會太鹹，伴有檸檬汁調味，墊有椰菜絲沙律解膩。
唐揚炸雞 $48
唐揚炸雞一客五件，正常size。伴有沙律醬，入口會更滑溜，炸得皮脆肉嫩，有肉汁。墊有椰菜絲沙律。
芝士吉列豬扒 $58
芝士吉列豬扒一大塊，已經切開6件方便食用。吉列皮好脆，入面豬肉好嫩口，加滿熱融拉絲芝士，熱辣辣上枱，墊有椰菜絲沙律。伴有沙律醬令入口更滑溜。呢款炸物正！
炸菠蘿伴海鹽雪糕 $28
第一次食炸菠蘿伴海鹽雪糕！一大片炸菠蘿面頭加上一球藍色海鹽雪糕球，再加上脆脆。香甜多汁熱辣辣炸菠蘿配少少鹹嘅融化海鹽雪糕，味道口感超正！
總括而言，天婦羅皮夠脆，入面食物多汁好味，不愧為天婦羅專門店。吉列炸物就好抵食！座位全部都係吧位，好似日本小店。枱上面有七味粉，同多款調味料，連櫻花蝦仔同魚仔都有，跟餐都有天婦羅汁。
