BTS美食站

今日同女朋友捉緊最後堂食嘅機會，放工之後去咗九龍城食飯，因為都唔知下次可以堂食係幾時，去到九龍城見到BTS美食站，原本以為係韓國餐廳，但望一望餐牌發現原來係泰國菜，諗起都好耐冇食所以就入去食啦。老闆亦都好好人喺等位期間都同我哋有傾有講。首先我哋第一樣叫嘅食物就係明路烏頭魚，佢嘅魚非常大條，而且一上菜都已經聞到好香嘅味道，令人已經流晒口水。之後亦都叫咗食泰國菜必要嘅金邊粉，佢嘅金邊粉亦都炒得好出色夠香，而且蝦亦都夠大隻，絕對好抵食。之後亦有叫兩隻雞全翼同埋豬頸肉，兩款肉都燒得好好食，而且豬頸肉亦都夠大塊都偏厚身。食完都覺得好滿足，最後亦都叫咗一個飛天炒通菜，整體來講，作為最後嘅晚餐亦都好滿足，希望可以快啲有返堂食啦。