終於嚟到八月，望穿秋水等到消費券嘅來臨🤩，我哋決定外出消費，食返餐好嘅，最終揀咗位於銅鑼灣嘅「火鍋隨意門」。當我哋入到餐廳，就知道點解佢叫隨意門呢😳。
餐廳以多國旅行做主題，店內劃分幾個區域，分別係土耳其、日本同法國等，其中我哋坐喺最矚目嘅土耳其區🇹🇷。四周圍嘅裝修佈置都好色彩繽紛，富有好強嘅民族風情。
招牌花膠雞湯鍋($298/半隻)，🍲花膠雞鍋聽落都知滋潤，仲係美顏之選，可以補充骨膠原。用上大量三黃雞熬製嘅高湯味道超濃郁，好好飲，舔舔脷😋。我哋飲咗半煲，已經飽咗一半，哈哈。湯底咁深色同時亦因為落咗南瓜一齊煮。題外話，餐廳加湯都係加返雞湯㗎，唔會溝淡咗。
花膠同雞分開另上，店員一開始會幫我哋剪開大大塊花膠，剪開後粗略估計有接近廿塊😍，超多。花膠夠厚身，口感好軟稔，索湯效果強。
雞肉份量足半隻🐔，其實上枱時經已熟咗九成，所以放落鍋滾三分鐘就食得。雞肉肉質嫩滑，而且肉嘅部份都幾多，唔係得啲骨。
魚滑三拼($148)，我哋喺丸同魚滑之間揀咗後者。魚滑有三款口味，包括黑松露墨魚滑、瑤柱乾貝滑以及手打蟹子蝦滑。既然可以三拼，就梗係食哂三款，加上價錢唔差得遠。一條魚滑可以刮到四粒，三款都好鮮甜，當中以蝦滑最彈牙🦐，而乾貝滑就相對較腍。墨魚滑則好香松露味。
鹹蛋黃炒響鈴($78)，響鈴即叫即炒，製作需時。由於響鈴新鮮炸起，店員建議我哋即食一件試吓，而浸湯食又係另一番風味。🍳流沙鹹蛋黃滲透喺整件響鈴入面，鹹香味均勻適中。
豬頸肉($58)，造型好靚，嫩粉紅色，砌成一朵玫瑰花🌹。摧花後發現原來豬頸肉有好多片，不過扣分位係未解凍得晒。豬頸肉唔錯喎，肉質爽彈，而且肥膏唔會過盛。
1
足料竹蔗茅根($68)，裝飲品嘅器皿好過癮，成個地球儀咁🌍，並附有一個開關口，唔使自己倒。佢嘅份量好似比起一榨還要多！竹蔗茅根好清涼，唔會過甜，亦可清清味蕾。小插曲一則：我掛住傾偈，開咗「水喉」之後唔記得閂，搞到倒瀉哂😣，真係唔好意思，好彩店員好好人，即時提供協助，亦毫無怪責之意🙏🏻。
最後不得不介紹一下醬油方面，醬介費每位$25。每枱會獲發一個醬油九宮格，入面有齊炒乾蒜、辣椒、蔥、芫荽、芝麻、蒜蓉同自家製薑蔥油。醬油架全程放喺枱，所以可以邊食邊夾🥢。當中有兩款係開胃前菜：青瓜同雲耳，酸酸辣辣。
總括嚟講，呢頓火鍋午餐幾正，花膠雞湯好出色。我哋感覺唔係嗌咗好多嘢食，但出奇地都食到好飽😉。餐廳現時推出限時優惠，當客人消費滿$1,500，更可以用$500消費券當$1,000用，不過我哋兩條友食，就當然食唔到去呢個價位啦。如果一班朋友想十下十下嘅話，不妨可以考慮呢度啊。
