之前已經食過佢既LUNCH，感覺唔差，炒麵有鑊氣，不過調味就重手得制。事隔幾個月，未知有無改善呢?!星期五晚上6點半到達，由於附近真係太多食肆，所以即使到左晚市時間都唔駛等位可以直入；由於太肚餓，所以點左個飯，另外，見加配小食既價錢實在太親民，所以加左兩個小食。
我今次點左餐廳人氣之選----
招牌燒豚肉飯定食 $88
1
每個定食都會包三款小食，今日係麻辣雲耳、炸魚肉卷(應該係，我食唔出係乜，味道一般)、朱古力蛋糕(朱古力味濃，內有朱古力粒)。
除左小食外，仲會有個餐湯同餐飲，餐湯我揀左冬蔭功湯。呢個又係好好味，夠酸、夠辣、夠椰，只能說「佢係我杯茶!!」
。
輪到主菜-----豚肉飯果然名不虛傳，真係好好味!!
青瓜絲、豚肉、飯既份量都好多!! 中間仲有一隻流心蛋，真係好豐富!!
豚肉入口酸酸甜甜，辣味慢慢滲出，重點係燒豚肉仲有一陣陣燒香味!!
肉質唔係肥豚，所以偏乾身，但我就係中意食呢D，食哂都唔覺膩。友人就點左----
汁燒安格斯牛肉飯配溫泉蛋定食 $88
呢個飯同豚飯相對就無咁震撼，不過由側面圖睇，佢既肉量其實都唔少，賣相亦好靚仔。係咪安格斯牛我就試唔出，因為醬汁太多，多到食唔出牛味，而且食落好鹹，真係好鹹!!
小食點左雞全部都雞-------水牛城雞翼$32、黑椒蒜香雞搥$26
前者一客有兩串，每串有兩隻；雞翼先劏開，再用竹籤串住黎炸，唔怕中間位唔熟。熱辣辣上枱，香氣迫人，趁熱食肉質嫩滑多汁
，味道唔會太辣，中意雞翼既朋友可以試。後者都係炸到金黃，偏重蒜味，肉質正常，無特別嫩滑感，勝在性價比高，$26有四隻!!
咁樣食法人均都只係$120，兩個大食鬼都飽到上心口，性價比真係好高!!
下次黎既話，想試佢既冬蔭功湯河。
