元宵節同朋友去黃大仙廟市集附近玩，之後我哋就揀咗間餐廳🍴坐低慢慢傾下計聚下舊。
啱啱好，我哋去嘅時候係下午茶時間，可以加錢換小食同埋飲品。
北寧香茅雞翼湯河 $45 （我哋揀咗金邊粉）
始終都係有少少凍嘅天氣，所以食一啲有湯嘅嘢都幾好。香茅雞翼有三件，煎得好惹味！
老街香茅豬頸肉飯 $48
豬頸肉薄薄地，有燒烤嘅感覺。比想像中嘅口感柔軟。整體嘅呢度菜式都幾好食。佢跟餐餸一碗冬瓜湯，趁熱飲！
下午茶升級優惠，我哋每個餐，分別都加配一份小食。
牛肉青木瓜沙律 $28
青木瓜酸酸甜甜，連埋啲牛肉好好食！
西貢扎肉蒸粉包（半份） $18
推薦呢一個小食，外層有少少粉果嘅感覺，成個扎肉基本上一口就已經可以品嚐，啖啖扎肉嘅滋味，令我想起去越南旅行嘅回憶！
朋友叫咗個椰青 $28
因為佢話想食得健康啲，見佢不停咁樣喺度不椰子肉，又話啲嘢椰子汁好新鮮！
越式滴漏咖啡 ☕️ $18 （熱）
我就揀咗越南咖啡，上邊有一個滴漏器皿，加上沸騰嘅熱水，就會見到一滴滴嘅黑色咖啡，慢慢由上面嘅器皿滴落去已經放咗牛奶嘅玻璃杯入面。慢慢一路食嘢一路等呢個咖啡自己沖好！沖完之後就移開上面嘅滴漏器皿，用匙羹🥄慢慢攪拌，令到黑咖啡同埋牛奶混合為一。有少少美式咖啡嘅感覺，牛奶味比較淡，咖啡味香濃！
我哋係窗口嘅位置，光線十足。空間感都唔錯。
職員態度友善，上菜都算快嘅！
4
