錦榮餐廳 (已搬遷) 新店位置

經朋友介紹話抵食之下，嚟到葵芳仁芳街錦榮餐廳食早餐;早餐時段非常之好，因為能夠喺11:30 前重可以落order, 所以筆者喺 11:15 到達餐廳；早餐都有4 款可供選擇 : 粥餐，麥皮餐，美式扒餐及自選百搭餐，筆者覺得百搭餐好超值，點超值? 因為可以揀 3款餸再可配湯公仔麵 or 湯意粉 or 湯通粉 or 湯米粉及再跟牛油餐包 or 多士，包多杯餐茶，如果唔要咖啡奶茶，可以揀杯 8安士果汁先生，都喺$27, 其它餐廳食個常餐加個餸都要加錢，所以好抵食。筆者揀了沙爹牛肉，雞肉腸 (餐牌表明喺雞肉) 及午餐肉配湯公仔麵，2塊三角形多士焊得好脆，脆得嚟唔喺硬實實嗰隻，好掂好味；腸仔及午餐肉都有煎一煎，好彩唔喺水烚腸仔，不過食完有些少喉乾；至於碗公仔麵好多麵，起碼都有 2 個麵，而沙爹牛肉份量就適中啦，沙爹味唔夠；最後點了杯餐茶喺奶茶，多茶，少奶，唔夠滑，都接受到。還有餐廳都好多嘢食選擇，筆者眼見其他食客都開始食 Lunch , 好多食客都點梅菜蒸鯇魚，那碟頭飯都好大碟。