魚魂98 (已結業)

喺旺角附近做完野, 谂住睇下附近有咩食, 结果就拣咗呢间喺豉油街嘅鱼魂98。当日正值中午12点, 门口已经有人等紧位, 但由于我只系自己一个食, 所以好快就安排到靠窗嘅一人位俾我。餐厅喺座位方面有照顾一人用餐嘅客人, 值得一赞。叫咗一个烧和牛粒丼嘅午餐set, 睇落都有唔少野食, 承惠58蚊。如果加汽水就额外再加5蚊。大概等咗15分钟先上菜, 略嫌有啲慢。个餐有一碗烧和牛粒丼、沙律、味噌汤、一串鸡肉串同生蛋黄。和牛粒丼上面嘅牛肉粒唔算少, 但有部份有筋, 咬落去都几韧, 但其余都几松软, 食落相当唔错。仲有半只溏心蛋、青椒、大蒜, 加上啲牛肉汁流咗落碗饭到, 所以送饭一流。鸡肉串用咗照烧汁烤过, 我自己就将鸡肉串沾啲生蛋黄食, 咁食落鸡肉串都几滑。整体黎讲, 六十几蚊可以喺旺角食到有咁多野食嘅一个午餐set, 都算几抵食。