尚鮮日式燒肉漁市場 (已易手) 新餐厅

呢間日式餐廳本身做開放題，往日午市就算做定食都$58起。現今生意難撈，推出抗疫大優惠，$38有交易！因為樓上舖關係，午市時段仲搵個人企響大廈門口派傳單拉客，帶埋你搭𨋢上餐廳，服務態度認真唔錯。食物方面，性價比亦算高，十個款式便當，價錢由$38-68。我點左個燒汁牛舌飯 $38，五分鐘就拎得。便當有一格係芝麻醬沙律，其餘兩格係飯，有飯素，醃蘿蔔以及洋蔥牛舌鋪面。雖然牛舌唔算大塊，但夠腍而且有七片都算多。不過如果燒汁多少少，無咁乾會更加好。另加$4有飲品，銅鑼灣區應該都幾難搵到類似性價比午餐。.原本諗住呢排響銅鑼灣返工就食呢間，點知返左一日就調返去九龍，無機會試下其他款式，小食同自家製樽裝奶茶添。