環境方面：外表裝修OK，但枱與枱之間就比較close，亦冇乜空閒可以放手袋之類，可能我坐得近大門，所以冷氣就覺得爭少少。
食物方面：我地點了小食拼盤、香蒜帆立貝意粉、紅豆綠茶雪糕窩夫。小食拼盤內有兩款雞翼，孜然及士多啤梨玫瑰味(我覺得似)、薯條、炸魚柳(冇魚味)、炸墨魚(粉漿係有味、墨魚冇味)、炸紫薯波(英文係咁寫，但食唔出，我以為係芋頭，有QQ感）；香蒜帆立貝意粉，蒜味香濃，但食完成碟仲有好多油；紅豆綠茶雪糕窩夫，好難食，好乾好硬，用刀切都要用D力先切開到，$82一份唔係平，但仲難食過街邊10蚊底雞蛋仔夾餅。
員工方面：有兩位女員工真係需要再倍訓，第一個，隔離枱埋單時，女侍應整跌客人手挽袋，跌落地＂坪＂一聲，我同朋友傾緊計都聽到，冇理由女侍應聽唔到，但一句對不起都冇就走開左，女客人即時打開睇，原來入面係玻璃飯盒，好彩冇爛，佢地都話侍應冇反應都有既！另一個，佢收拾我地枱面時，D刀刀叉叉對住我地時已經好有問題，收碟時碟沙律醬飛左埋我方向，我即時彈開，佢完全冇反應，一句唔好意思都冇，咁就走左。呢個係員工應有的禮貌及態度嗎？？
無論係食物、服務，我諗我不會再光顧了！
