馬師傅菜館 (已結業)

本人十分鐘意食點心，所以今次就黎試下馬師傅，因為呢間係老字號，所以就想試下，同埋點心大部分都係兩件一份，可以試多啲唔同嘅野！嗌左個熏蹄拼腩仔飯，腩仔皮脆肥肉平均，好新鮮，不過鹹咗少少，熏蹄味道適中，配佢個醋一齊食好開胃又唔會好溜！春卷炸到有啲燶，個邊黑左，入面包住芋頭餡，味道都唔錯。 鮮蝦腐皮卷炸到好鬆脆，入面有蝦肉，西芹，蘿蔔絲。跟住講下蝦餃燒賣呢啲傳統點心，雖然味道唔錯，但就細粒左小小，蝦餃皮薄，蝦嘅分量還好，一口食落去冇啖啖蝦肉嘅滿足感，燒賣個人認為普通，同一般茶樓食嘅大同小異。牛肉球一樣無咩特別，一盅兩件。咖哩土魷味道香濃，土魷都新鮮，咬落爽口，唔會蒸過龍一pat野咁。薑蔥牛柏葉就唔會好濃味，清清地有薑蔥嘅味道，同樣唔會蒸到過左龍，食落口依然爽口，又唔會好韌。最後係棉花雞，呢個真係有驚喜！一般出面蒸出黎棉花雞嘅棉花都會比啲湯汁浸到發哂，食落口就好似一舊麵粉咁，呢個棉花爽脆彈牙，仲吸入哂雞嘅味，唔會只有口感但冇味道，值得一讚，而雞肉唔會蒸到鞋，依然好滑。