炊(吹):煮飯
豕(始):豬
顧名思義,炊豕店係一間整豬扒既專門店
再準確啲黎講,係炸豬扒專門店
睇返菜單,除左豬扒,仲有其他選擇既
不過我每次都會叫豬扒飯
通常都係叫肉燥個款,但有時都會試下其他
尤其是係佢周不時都會推出期間限定既口味
早前係慕油豬扒,而依家最新既係避風塘豬扒
見到有避風塘口味咁特別,今次一於就試下你啦
避風塘豬扒 $58
一黎到見到,個賣相已經嬴哂
味道亦都係一流,見到啲紅椒已經知道會辣辣地
加上上面一粒粒既配料,真係好惹味
另外有好多好多紅洋蔥調返少少味
(紅洋蔥係有啲清甜味,咬落都係爽口啲既)
至於主角,即係塊豬扒,水準同以往一樣
外面塊皮炸得又薄又脆,入面啲肉半肥半瘦,仲有啲汁濟出黎
每一啖咬落去都好滿足
而且塊豬扒又大塊又厚,好大方,每次都會食到好飽
五十幾蚊可以食到啲咁有質素又有份量既飯,真係夫復何求
正當我苦惱緊點樣入手/入口好,因為面頭舖滿豬扒,好難撥開食飯
店員即刻主動比多左個碗我裝,夠細心,,抵讚
可能大家都已經發現隻滑蛋
事緣係我係吧枱見到師父整叉粒豆角蔥花炒滑蛋飯
個滑蛋水汪汪,好吸引
所以加料配返個炒滑蛋啦 (+$10)
下次可能會正式試下佢個叉粒豆角蔥花炒滑蛋飯
炸芝麻雞翼 $26
想試炸芝麻雞翼好耐
好彩今日仲有胃口,終於有機會試下啦
炸到菂色水好靚金黃色,芝麻都灑得好平均
炸雞翼好重要既一點係個雞翼尖尾要脆到可以食埋
呢一點炊豕店就做到啦
我第一啖就係咬個雞翼尖尾,熱辣辣,卜卜脆
味道微辣帶點咸味,調得岩岩好
溫馨提示:一定一定一定要趁熱食!!
煎蛋焗豬扒飯 $80
同場加映上一次黎食既焗豬扒飯
早排有報導係關於全港7大焗豬扒飯
炊豕店就係其中一間啦
唔好睇佢價錢係貴過其他,因為真係物有所值
首先芝士落得好足,好多拉絲任你玩
蕃茄酸酸甜甜,好開胃
飯底就當然係金黃色既炒飯底啦
再配會埋個鎮店既炸豬扒
不愧為全港7大焗豬扒飯之一
份量都係好足,幾經辛苦先至食得哂成兜飯
黎到銅鑼灣一定要試下炊豕店,性價比實在係太高啦
另外店內播既歌好岩聽,好多都係90後一定會聽過既金曲
好多人排隊~
