香港大牌檔 (已結業)

之前有同事推介呢度嘅鐵板晚餐，咁啱心血來潮想鋸扒，於是特登同男朋友嚟試下。一聽到「香港大牌檔」呢個名，已經覺得好有懷舊味道，原來入面嘅擺設都以六、七十年代嘅香港做主題，好有趣。行上二樓嗰陣，見到牆上面有好多明星名人嘅簽名，竟然畀我搵到我偶像陳肇麒個簽名呀！食鐵板餐，最緊要夠熱，呢度就完全合格喇。平時食羊扒，通常都係配芥末汁，但原來配香蒜汁都好夾喎。羊扒煎得幾香口，但又唔會太燶，好嫩滑，冇筋，而且肉汁豐富，名副其實皮脆肉嫩呀！羊肉食落冇羶味，仲醃得幾入味，食到陣陣香草清香，肉多骨少，唔錯喔！文也石斑都okay，食唔到雪味，反而有少少牛油香味。其他配角薯仔同雜菜都幾新鮮，整體嚟講，都幾滿意，同事果然冇介紹錯。男朋友就叫咗個炭燒牛肉配美國雞扒鐵板餐，味道都唔錯，不過我哋掛住食，唔記得咗影相o忝……