三少冰室 (已結業)

環顧現今市面，有人話茶餐廳買少見識少，取而代之冰室大行其道，睇落都不無道理。不過究其實，萬事都係一個循環，以前香港都有好多冰室（30年前）後來逐步轉型，茶餐廳興起。呢一日去堅道探朋友，之後獨自經過般咸道，見到呢間冰室，果然冰室當道，不過吸引我既係佢個名，三少冰室，頗有瀟灑風流既意味。而同一般冰室唔同，呢度食物種類涵蓋早午晚，頗為豐富，就入去試下。入面裝潢都係老香港情懷，食正近年集體回憶風潮，感覺係親切，舒服。師傅教落話，最基本既嘢最難做。一間餐廳基本嘢做得好，其他一定唔會差。而乾炒牛河簡直係港式食物經典，無人不曉，今次就試呢樣。賣相似模似樣，色香俱全，一睇都知道夠鑊氣，師傅水準有保證。河粉炒得算乾身，一般人可能覺得唔夠油光，但係現今普遍注重健康，少鹽油糖係大勢所趨。無礙。牛肉有咬口，感覺新鮮無雪味，整體而言滿意。見到餐牌有林林種種食物，包羅萬有，下次都可以回來再試。