花斑茶社 (海之戀商場) (已搬遷) 新店位置

終於都有機會嚟到荃灣新開嘅海之戀商場，去朝聖企鵝店之餘，都不忘幫襯下一啲本地小店，支持黃色經濟圈。喺門口已經見到大大隻嘅pepe望實我地，入邊仲有啲許願嘅掛牌，俾客人寫上願望，真係幾有心思同創意。我哋兩個人，一人叫咗一杯飲品，大大力支持黃店。間店佈置得好靚，有一幅牆全部都係粉紅色嘅玫瑰花，打卡一流呀。我要宇治抹茶紅豆鮮奶，顏色分明，而且有種好柔和嘅感覺。第一啖已經飲得出係用靚既綠茶粉沖出黎，濃郁嘅綠茶味加上香滑嘅鮮奶，配合軟綿綿嘅紅豆增加口感，非常夾。下次行過繼續懲罰下佢，兩杯以上仲有八折添，真心抵飲。