大觀麵膳 (已結業)

是日又係無帶飯，同同事行出去食lunch, 咁啱朝早同同事講開呢間小店食魚麵幾特別，之前亦有同事試過話好抵食，一於就去試下啦。小店入面真係小小的，幾張枱做下街坊生意，事頭婆一手一腳打點。落單形式係用落單紙剔，一碗一張，任你點粉麵餐，唔同餸唔同價錢，我當然要試最出名嘅醉雞($32)，加$8要多個古法魚腐，潮汕魚麵就要另加$7。個魚麵好彈牙，似係鯪魚球嘅口感，應該係用新鮮魚打出嚟，幾特別。醉雞味道不錯，份量都大碟，不過揀擇嘅我平時就食開雞肶，所以食得唔係咁爽，但個雞係入味嘅。魚腐口感都煙韌彈牙。碗麵份量唔算多，女仔食都ok,男仔可能要嗌多幾個餸或者加多底麵喇。粉麵餐送飲品，情急之下嗌咗西梅汁，點知中咗伏，個味係好假嘅黑加侖子糖漿溝水，不過當糖水咁飲啦都係解渴。埋單$48,好抵食，今時今日都冇乜邊間小店依然可以做到平價之餘又有質素嘅食物呢?推介小店俾大家多多支持!