因為得我同媽媽兩個人，所以叫做一個麻辣味大邊鍋烤魚小辣加8蚊轉配手抓餅，另外叫左六串串燒，三串羊肉三串雞都係小辣，另外烤魚再加20蚊配全菜，有大豆芽，金菇，連藕等配菜。
可能我地去果陣時間仲早，唔駛等位之餘，好快就有得食，個魚上到枱，一陣麻辣味已經轉入個鼻，好正呀，口水不期然流出黎啦。諗住食之際，店員走埋黎細心咁幫我地分開條魚，等佢入味d，然後再介紹可以出左個魚腩先，因為比較薄快D入味喎。唔該哂~
兩個食一條大邊(有差唔多兩斤)真係多左小小，不過香香麻麻辣辣咁好開胃喎，條魚烤過先放入個爐到，魚皮脆脆，稍為浸一浸D汁再食.. 勁正。淡水魚一向無咩魚味(我覺得)，但係唔知係咪用左麻辣汁反而仲帶左D魚鮮味出黎，D魚肉好甜呀。
魚食左一陣就上串燒，好香既子然粉味，小小辣辣地，羊肉咁岩有D根所以有小小硬，不過幾好趙口囉，雞肉就好滑好好味。
手抓餅我就咁食，媽媽就用黎浸汁，好好味喎~ 下次再黎都要食手抓餅先。其實佢無個魚鍋都會配送兩個白飯，要手抓餅就要加8蚊，但係我地又唔係好鐘意食飯，手抓餅又未試過同埋都係加8蚊啫，所以轉左手抓餅，果然無令我地失望，呢8蚊係物超所值既。
兩個人每人百幾蚊，加埋啤哂汽水就飲飽食醉.. 味道又好~ 正呀~
