合一咖啡屋餐廳 (已結業)

因為情人節已預先BOOK位，本來期望可以即時入座，但店內略為淺窄，故仍需排隊5分鐘，等候安排才能入座，但問題不大。店內氣氛唔錯，就算坐門口位都唔會特別覺滋擾或嘈雜。WAITERS醒目反應快上菜時間一碟接一碟。食物每碟份量睇落唔多，但食到最後都好飽，差D食唔落甜品。南瓜龍蝦肉湯足料好味，頭盤帶子配魚子醬味道鮮甜，所以一開始已食慾大增，感覺良好。略嫌主菜肉眼扒火侯不均，有D好好食，有D比較韌，可能趕住起菜。但其他都幾好食，主菜肉眼扒之外，海蝦菠菜扁意粉的醬汁幾好味，仲好足料好多蘑菇。最後甜品係Chocolate cake加蘋果批，兩件都好高水准，但Chocolate cake比較濃味可能未必個個岩，蘋果批就係新鮮焗起，皮好薄餡甜度適中，一向對蘋果批有好感嘅人會特別鍾意。情人節出街食飯就預左會被殺一頸血，但呢間價錢未係天價，仲有唔錯的食物水准，味道、賣相都比預期好，實在值得推介，日後會再考慮黎食多次。