今次一於試下東海，一段時間之前都試過，果然無令我地失望！
首先都要多謝爸爸去攞位先，假期真係好多人，等成二三十張枱！
不過值得既，因為入面環境舒服寬敞，我地仲坐到窗邊位，落地玻璃透入陽光，令人感覺好悠閒！
枱與枱之間夠空間，樓底又高，唔會太嘈，驟眼睇好似無乜搭枱，坐得好舒服，張枱又夠大，擺十碟八碟點心都仲得。相反稻香就總係好局促，好迫夾咁。總之一坐低，就可以輕鬆嘆下茶。
叫左十幾個點心，有啲太餓無影到
呢個紅油抄手呢，賣相唔錯架，不過味道就唔正宗，似普通雲吞咁。
叉燒腸新鮮蒸，熱辣辣，用料足，好味！
好耐無食過牛柏葉有呢種質素，爽口彈牙，重要既係唔肥膩，一般都好似油浸咁。
金錢肚略嫌少左啲，但個茨唔厚，幾好食。
蝦餃又係新鮮滾熱辣，皮薄餡靚，蝦又大隻。
奶皇包比一般既細隻啲，不過都唔錯。
我自己好鍾意食傳統馬拉糕，好多酒樓整到好肉酸蒸過龍咁，但呢度整得岩岩好！好味！
當然唔少得燒賣，又係大大隻蝦，滿足到我屋企人最愛燒賣蝦餃！
牛肉本人唔好，但賣相幾好！
糯米雞確實有啲失望，因為無乜餡料。
綜合黎講，飲茶都係想同家人開開心心enjoy下家庭樂，環境舒適令人坐得舒服，場內唔會聽到不停叫咪嗌number果啲壓力，傳菜既姐姐都好attentive，唔會十問九唔應，或者扮睇你唔到。
而食物的確係唔錯，可能真係試得太多稻香，太大對比！雖然價錢都同稻香有幾大距離，但各方面我都覺得好合心意！總之就一定會再黎啦！
