元気寿司 (已搬遷) 新店位置

由唔知幾時開始，每個月都會食一次元氣，通常想食壽司嘅時候，第一樣野一定會諗到元氣。其實元氣喺德福開咗好耐，大概八年前，試過食三文魚壽司嘅時候，拎起塊三文魚，見到下面舊飯有橙色嘅痕跡，之後好耐都冇食過，係其他分店推出高速線同埋元氣大改革嘅時候先再試返，啲質素比以前高質咗好多，啲刺身非常新鮮，之後都忍唔住每個月會食一次，好多時候都會自己一個人嚟食添，或者買外賣返去屋企食，元氣有個app可以俾你喺嗰度訂外賣，非常方便。帆立貝刺身係新推出㗎，叫咗一碟嚟試下，都係鍾意叫$17一件嘅帆立貝壽司多啲。以前軟殼蟹手卷師傅都會加青瓜，唔知係咪餐牌轉左少少，今次冇青瓜喺入面，啱晒我呢啲唔鍾意食青瓜嘅人。肥牛烏冬都係新加入餐牌入面嘅，比起其他烏冬來講都算抵食，啲肥牛唔會話太多肥膏，啲肉味都好重，香過嚟打邊爐嗰啲。