森戶 (官塘立成大廈) (已結業)

新年本身想約朋友食新年飯，點知就禁咗堂食，唯有約早啲食個「早晚餐」。森戶分店有好多間，今次就去咗牛頭角分店，都幾近地鐵站。我地去到已經四點幾，睇睇餐牌發現餐廳做緊抗疫優惠，竟然Omakase「戶」同「山」堂食同外賣自取第二位都有半價。另外12至6點單點都可以有9折。我地最後都係決定食lunch set，套餐會跟埋麵豉湯同茶碗蒸。我地就揀咗一丼飯一壽司拼盤。特上北海丼 ( 吞拿魚 , 油甘魚 , 帶子 , 海膽 , 牡丹蝦 , 三文魚籽 , 三文魚 ) 超級豐富嘅海鮮丼，有成八種刺身！呑拿魚係拖羅位，非常肥美，油脂感十足。海膽新鮮creamy，無腥味。帶子都好厚切，夠鮮甜！份量好十足，二百蚊唔使都幾扺食。壽司拼盤（吞拿魚腩, 帆立貝, 三文魚, 油甘魚, 金線鯛, 池魚, 真鯛, 甜蝦, 蔥吞拿魚腩, 三文魚籽 ) 拼盤總共有十件壽司，師傅手勢都好好，每件都握得好靚。估唔到會有金線鯛同真鯛呢兩種鯛魚，味道好鮮。另外仲有蔥呑拿鮮同三文魚籽都係我最鍾意嘅肥美之選。配埋嘅茶碗蒸都好滑，適合清清味蕾。我地另外仲加上幾串串燒串燒雞腎、雞翼、五花腩串、牛舌燒得好有火口，外面燒得脆口，內裏又唔會乾身。