The Mafe Cafe (已結業)

今日同朋友行完旺角，見到有間新開張嘅Cafe ,搭電梯上去嘅時候見到兩間名字相似嘅cafe，一間係孖啡 (double cafe), 另外一間就係我今日去嘅MAFE cafe, 約咗人嘅話，記得睇清楚唔好行錯路啊。見到餐牌嘅飲品都算多，但奇怪嘅係見到menu係用孖啡嗰個，一問之下先知原來呢兩間係姊妹店。我點左一杯藍莓乳酪，上面有幼滑嘅cream，將佢混合之後又有藍莓同乳酪嘅香味，好light 好fresh, 我自己幾鍾意，不過友人話可以甜啲。之後叫咗一個risotto, 好重黑松露同忌廉嘅香味。最鍾意佢嘅飯粒好有口感，韌韌地，有𡁻口，唔會好似有啲餐廳用軟林林嘅飯，完全冇咗食意大利飯嘅風味。總括來講呢餐都幾滿足，以樓上咖啡店嘅水準來講，呢度嘅性價比都幾高。