倫敦大酒樓

营业中

休息中

細個係住港島區，所以好少過九龍，大個之後先識旺角哩間倫敦大酒樓。潮流興懷舊，最近好多人提及倫敦酒樓仲有推車仔賣點心，咁就嚟試吓啦！雖然地方都寬敞，但佢哋啲車仔都唔係推嚟推去，只係泊兩架喺度，等啲人自己埋去攞！咁唯一俾到我有啲懷舊感覺嘅，就係啲人自己捧住啲點心埋自己張枱囉！記得細個見啲大人都係走出去睇吓有咩點心，因為驚住啲車仔俾人攔截哂！😅點心方面，腸粉好食，粉質地係以前嗰種滑、薄得嚟唔易爛，但又唔係依家有啲煙韌到唔似腸粉皮！蝦餃有筍！👍🏻依家啲蝦餃只係大隻多蝦！其實好食嘅蝦餃唔需要大隻，啱啱好一啖就好，而且要有筍囉！燒賣就同蝦餃飲茶係一定要有嘅，但佢嘅燒賣就麻麻，我唔係要有蝦，但一定要有冬菇，否則就只係一嚿豬肉囉！佢嘅薄罉都唔得，厚身麵粉，少韮菜，用火腿！🙄無香味！記得細個食嗰啲，係有糯米粉+粘米粉、蝦米、韮菜、菜甫，煎得薄薄，邊有啲燶脆，中間軟糯。整體不過不失啦！