餐廳與肉檔、雜貨店三合一。你可以直接喺肉櫃前面揀自己鍾意嘅牛扒部位，按重量計價（堂食已經包埋煮理費），呢種玩法真係好個人化。佢哋標榜用農場直送靚食材，啲肉全部冇激素、抗生素，食得安心。
逢星期二有T-Bone牛扒半價優惠，無論堂食定外賣都適用。呢個優惠真係好hit，吸引好多牛魔王專登嚟食。想食要早啲book位或者早啲到，唔係就好易賣晒。
👅蒜蓉蝦配烤麵包
絕對係必嗌前菜!大大隻蝦又彈牙，蒜香味同微辣味好出。烤麵包外脆內軟，點埋個蝦汁真係冇得頂。啲蝦隻隻都咁新鮮，加埋辣椒蒜蓉超正，夾埋sourdough一齊食真係一流，個汁一定要點！
👅炸大啡菇條
外皮炸得香脆，但入面仲keep到大啡菇嘅juicy同鮮嫩。呢道菜無論做前菜定係配菜都好適合，真係會食到停唔到口。
👅草飼牛肉漢堡
份量大，足夠兩個人share 黎食，麵包軟熟，牛肉漢堡扒燒烤味香濃，配酸瓜食可以解膩，都算juicy 👍
👅穀飼西冷扒
親自去肉櫃前揀嘅牛扒好似特別好味。每一塊扒都有標明價錢，每種扒睇落都好吸引！今次叫五成熟，外面煎到焦香，裡面仲keep到肉汁，牛肉味好濃，脂肪分佈又均勻。上菜時，侍應會好細心介紹三款芥末醬俾你配牛扒，包括小辣嘅Dijon、有咬口嘅Whole Grain Mustard同埋比較辣嘅Hot English Mustard，總有一款啱你口味。
👅風乾火腿布拉塔芝士薄餅
Pizza都係即叫即焗，熱辣辣出爐，餅底厚度啱啱好，唔會太薄又唔會太厚，餡料十分豐富！舖滿曬風乾火腿，火腿同芝士噶鹹香味真係好夾。
👅忌廉菠菜
呢味配菜同牛扒真係絕配。濃郁忌廉同清爽菠菜平衡得好好，可以有效解咗肉類嘅油膩感。
餐廳地方好大，有室內同室外座位。室內環境優雅，好有復古feel。室外就可以睇到荃灣海景，特別係日落時分真係好浪漫，而且仲係Pet-Friendly，可以帶埋毛孩一齊嚟食飯。當晚仲要有live music聽！氣氛感爆棚！
2
2
3
3
