OK德海南雞專門店 (天晉滙)

見外面大大個餐牌棟係門口，寫住下午茶餐，入到去分明係茶餐廳嘅格局同服務，心諗叫個茶餐廳的名物焗豬扒飯，應該好穩陣，點知中伏。
正確嚟講，他們下午茶餐牌上叫我食嗰個做「焗鮮茄菠蘿豬扒飯」。話明茶餐，我配的是熱檸水，先來，極細杯，食飯前都不敢飲，怕食完再無水飲。無錯，唔同平常茶餐廳一坐低就有茶水放係面前，呢間無。算，我唔會為一杯水而計較，我只希望食一個正常的飯，細啲都無所謂，話明下午茶，但係無諗過個飯可以咁難食。

「焗鮮茄菠蘿豬扒飯」佢的確有焗過；都有一角蕃茄，奇怪的是無皮但有椗；菠蘿超細粒，一粒粒，又乾又無菠蘿味，就算當你用罐頭菠蘿粒，都仲要切到一開三咁細?!佢有落紅蘿蔔，但係唔煮透硬實實的幾嚿紅蘿蔔可能唔落反而仲好。豬扒一塊，明顯無剁鬆過，不過都算，唔能夠要求太高。焗豬扒飯重點是個炒飯底，佢啲飯又硬又乾又無味，從未食過如此難食的炒飯。汁又少，大部份時候我都只能乾哽硬飯，因為實在太少汁。天啊，我去得茶餐廳都唔係要求高，只想要一個普普通通的焗豬扒飯，無諗過今日呢個可以難食成咁囉！