啤啤Bear韓國包車 (已結業)

餐廳位於諾士佛台1號，地點相當方便，店內裝修相當韓風，Y2K style，有街機，籃球K做裝飾，適合打卡。有弘大年青人嘅感覺。今次兩個人點咗四樣嘢，份量好大份，全部味道都好好，幾正宗。芝士鐵板泡菜炒五花肉，啲芝士多到拉曬絲，作為芝士狂熱粉絲我，比100分🤣蕃茄韓式辣海鮮湯麵，面質彈牙，點煮都唔會淋曬，十分好，味道方面雖然係辣味，但有蕃茄中和，所以辣度啱啱好。辣炒小章魚都好好食，適合配啤酒！另外仲叫咗一個原味炸雞，份量超多，仲要係冇骨嘅，啖啖肉，好滿足。整體嚟講，店內座位闊落，坐得舒服，飲酒唔一定要去下面酒吧，可以嚟哩間，食住韓國菜，炸雞啤酒燒酒同朋友傾偈，價錢亦都唔貴，十分推薦。