又到十二月相信大家都開始忙緊計劃聖誕食啲咩，想搵一間野食好味，環境舒服又唔會劏人既餐廳一啲都唔容易，小編介紹一下依間最近食過啱哂慶祝聖誕既餐廳比大家啦🤓餐廳雖然位於觀塘工業區，但裝修相當華麗，成個餐廳都係胡桃木既主題，擺設咗聖誕樹，仲有一排植物掛滿咗閃下閃下既燈，一入餐廳已經覺得好有浪漫既氣氛🤩而且餐桌唔會放得好近，啱哂想靜靜地小酌談下心既情侶🫶🏼
餐廳行套餐形式，一律$398/set，晚市嘅menu入面主菜四選一，搭配三款前菜、任食薯條，而十二月新開張仲會送100分鐘免費暢飲指定紅白酒😈
前菜會不時換款，而當日既前菜就分別係#西班牙鬆脆包、#翠綠青沙律、#泡沫烤南瓜湯，單係前菜已經睇得出餐廳充滿誠意，餐包配咗香蒜希臘芝士醬同油浸番茄🍅而沙律菜都好新鮮，淋上咗香草芥末籽油醋汁，仲有好香口既焦糖合桃🥗就連泡沫烤南瓜湯都有驚喜，用個迷你既咖啡杯裝住，飲落去有好濃烈既南瓜味，忍唔住兩啖飲哂🎃而任食薯條亦無交頹貨，炸得香脆之餘仲shake咗香辣粉增添風味🥔
—
《 #美國 1855 安格斯西冷牛扒》$398/set ⭐⭐⭐⭐💥
主菜上枱之前侍應就會拎個架過黎，下面點著個蠟燭，等主菜既食物盤可以放係上面保持住溫度，唔怕食得慢會凍哂，食到尾啲野食都仲溫熱真係好幸福😽
本身對牛扒都無抱好大期望，但出乎意料地牛扒好出色😺單睇外觀已經係完美既三成熟，中間粉嫩而無血水💓用咗迷迭香、海鹽同蒜片去調味，配咗燒肉汁同香草橄欖油🫒牛肉肉質軟腍，完全無筋，肉味濃而且充滿肉汁，西冷上面既肥膏位亦處理得唔錯，焦香易咬🫦
—
《 #香草焗原條法國鱸魚》$398/set ⭐⭐⭐⭐
雖然只得四樣主菜，但係小編都係鱸魚同黃油大雞之間掙扎咗好耐，最後因為見到隔離枱點嘅大雞太大份怕食唔哂，所以點咗鱸魚😹餐廳細心地將鱸魚起咗骨，等客人可以食落啖啖肉，仲煎香咗半粒檸檬，可以唧落魚到提味😈鱸魚既表面鋪咗大量既香草，而揭開魚肚都係滿滿既香草同蒜片調味，好有心思🍀相比牛肉，魚肉比較清淡，味道有些許被香草蓋過，魚肉頗厚，脂肪唔多但幾嫩滑🐟
