Chop Chop 食神叉燒 (新城市廣場) (已結業)

自己睇咗好多食評，寫得好嘅可以寫到好誇張，寫得唔好嘅亦都寫得好誇張😂😂，自己行開沙田，真係順路就試一試。同大家一樣，我都叫咗個暗然銷魂叉燒飯，叉燒切得比較薄，但佢上面就有一層蜜汁，而且特別鍾意嘅係佢個秘製醬料，佢個醬料應該唔淨只係豉油，裏面應該仲落咗姜戎，同埋其他唔同嘅嘢，惹味，亦都幾甜。個飯就都幾好食，傳聞呢度用咗黑龍江嘅米。之後就係呢度嘅湯，個湯都好夠味，我飲嘅係七小豆煲粉葛，同我屋企比，呢度稍為有少少鹹，但整體來講都好夠味。之後就食呢度嘅小菜，咕嚕肉，咕嚕肉佢都真係好不計成本，我叫一碟小菜，佢俾咗10舊肉我，幾好。食神炒飯亦都唔差，有蟹子喺上面，就住創意來講，都值得欣賞。但如果個飯可以更加熱的話，就更好。飲品方面我叫咗個鹹檸七，不過不失。